Олунньу 19-20 күннэригэр Чурапчыга “Тыл – омук тыына” өрөспүүбүлүкэтээҕи форум буолан ааста. Бу киэҥ далааһыннаах тэрээһиҥҥэ Дьокуускай куораттан саха тылын учууталлара У.Г.Сыроватская салайааччылаах баран кыттыыны ылан кэллибит.

Бастакы күн “Айылгы” улуустааҕы норуот айымньытын дьиэтигэр сүрүн мунньахха ыҥырыылаах ыалдьыттар: Жиркова Р.Р, Бугаев Н.И, Торотоев Г.Г, Шамаева Л.П, Мандар Уус, Санаайа, Дабыл, Сэмэн Тумат -  төрөөбүт тыл туһунан дакылааттарын иһиттибит. Ону таһынан Санкт-Петербуртан тыл үөрэхтээхтэрэ Дубровина М.Э, Пылев А.И, ыраах Турция Хажеттепе үнүстүүтүттэн аныгы түүр тылын чинчийэр Хасан Хайырсевер тыл этиилэрэ сүрдээх кэрэхсэбиллээх буолла. 

 Эбиэт кэннэ С.К.Макаров аатынан гимназияҕа 8 түһүлгэнэн үлэлээтибит. “Кыыс оҕо – омукпут анала” түһүлгэҕэ №38 оскуолаттан Матвеева Н.А “Сахалыы айымньылар нөҥүө кыыс оҕону иитии”, “Саха тылын саргыта” информационнай технологиялар түһүлгэлэригэр 20-№  оскуола саха тылын учуутала Федорова М.М “Использование образовательных платформ на уроках родного языка и литературы”, “Төрөөбүт тылынан ааҕыы суолтата” түһүлгэҕэ 26-с № оскуолаттан Аммосова М.Н “Кэскиллээх тыл”, 7-с № оскуолаттан Петрова Ж.Н “Оскуолам эйгэтэ: төрүт тыын, үгэстэр”, куорат саха тылын учууталларын методическай холбоһугун салайааччыта Борисова М.Н “Тыыннаах тыл” бырайыагы кэпсээн төрөөбүт төрүт тылы сайыннарыыга бэйэлэрин санааларын үллэһиннилэр. Форум бастакы күнэ дорҕоонноох оһуохайынан түмүктэннэ.   

 Форум иккис күнэ лингвист, тыл үөрэхтээҕэ, бастакы алпаабыты айбыт С.А.Новгородов аатынан оскуолаҕа салгыы ыытылынна. Манна “Олоҥхо кэрэ эйгэтэ” түһүлгэҕэ Айыы Кыһата гимназияттан Липатова С.А “Олоҥхону үөрэтии саҥа саҕахтара”, Яковлева Д.Н “Олоҥхону үөрэтиигэ оонньуу технологиятын туһаныы”,  “Ийэ тылтан тирэнэн” түһүлгэҕэ куорат саха тылын учууталларын методическай холбоһугун салайааччыта Борисова М.Н “Тыыннаах тыл” бырайыак туһунан кэпсээн төрөөбүт тыл эйгэтин тэрийиигэ бэйэлэрин уопуттарын дьон-сэргэ дьүүлүгэр таһаардылар. Икки күн устата үгүс дьону түмэ тардыбыт форумҥа тиһигин быспакка араас сонун, сэргэх  тэрээһиннэр тэҥҥэ бардылар. “Бичик” кинигэ кыһатын атыыта, “Саха айар кутун алыба” быыстапка, Чурапчы талааннаах оҕолорун кэнсиэрэ мустубут дьон сэҥээриитин ылла. “Тыл – омук тыына” өрөспүүбүлүкэтээҕи форумҥа аан бастаан ыытыллыбыт “Төрөөбүт литература” дистанционнай оонньууга Айыы Кыһата гимназия саха тылын учуутала Яковлева Д.Н муҥутуур кыайыылааҕынан тахсан үөрүүбүт өссө үрдээтэ. Ийэ тылбыт инники кэскилин түстэһэргэ туруулаһа сылдьар үгүс дьон санаатын истэн, элбэх сонуну, саҥаны көрөн, бэйэбит эмиэ этии киллэрэн, салгыы өссө айымньылаахтык үлэлииргэ кынаттанан кэллибит.

Айаммытыгар транспорынан кѳмѳлѳспүтүн иһин Тулагы орто оскуолатын директорыгар Иванова Изабелла Сидоровнаҕа уонна суоппар Винокуров Владимир Юрьевичка  махталбытын тиэрдэбит. Үлэҕитигэр үрдүк ситиһиилэри!

 Куорат Саха тылын учууталлара.