Бу улахан суолталаах тэрээһин улуус бары үөрэх тэрилтэлэрин, уһуйааннарын, общественноhын хабан ыытылынна.  Ол курдук, бэлиэ тэрээһини Үөһээ Бүлүү улууһугар арыйыы үөрэх тэрилтэлэрин олунньу ыйдааҕы сүбэ мунньахтарыттан саҕаланна. Манна нэһилиэк баһылыктара, депутаттар, үөрэх тэрилтэлэрин салайааччылара, уһуйааччылар, иитээччилэр уонна төрөппүттэр быһаччы кыттыылаах сыл устата ыытыллыахтаах тэрээһиннэри торумнаатылар, ханнык хайысхаҕа туһааннаах үлэ барыахтааҕын туһунан дьүүллэстилэр. Үөрүүлээх быhыыга-майгыга Бүлүү улууһуттан айаннаан кэлбит эстафета кубогын үөрэх салалтатын начальнигын солбуйааччы Н.А. Филиппова  Үөһээ Бүлүү улууһун үөрэҕин салалтатын начальнигар С.О. Борбуевка туттарда. Оскуола директордара уһуйаан салайааччыларыгар сибэкки дьөрбөтүн утары ууннулар, «Сардаана» уһуйаан иитиллээччитэ кылыhахтаах куолаhынан ыллаан дьиэрэппитин дохсун ытыс тыаhынан уруйдаатылар.

Былааннаах тэрээһин чэрчитинэн улуус уhуйааннарын иитээччилэрэ идэлэрин таhымын үрдэтэр куурустарга үөрэннилэр, санаа, сатабыл үллэстэр научнай-практическай кэмпириэнсийэҕэ кытыннылар, маастар кылаастарга сырыттылар. Итиэннэ өр кэмҥэ үөрэҕирии эйгэтигэр үтүө суобастаахтык үлэлээбит педагогическай үлэ бэтээрэннэрин чиэстээһин, үлэлээн ааспыт кэмнэрин көрдөрөр быыстапкалар бэрт сонуннук тэриллибитин бэлиэтээтилэр. Дьокуускай куоракка олорор бэтэрээннэрбитин кытта көрсүһүү кулун тутар ыйга былааннанарын үөрэ иhиттилэр. Онтон улуус уһуйааннарын иитиллээччилэригэр анаан ыытыллыбыт хотугу норуоттар оонньууларын күрэҕэ эмиэ бэрт киирсиилээхтик, умсугутуулаахтык ааста. Манна барыта 17 уhуйаантан 74 оҕо кытынна. Музыка кэрэ эйгэтигэр уһуйар иитээччилэр түмсэн «Музыка для всех» бырайыак тула санааларын этиннилэр, муспут уопыттарын үллэhиннилэр. Улуус уhуйааннара талба талааннаах иитээччилэрин, уһуйааччыларын түмсүүлээх кэнсиэрэ олунньу 16 күнүгэр оройуоннааҕы култуура дьиэтигэр толору саалаҕа үрдүк таһымҥа ыытылынна. Манна киирии билиэтинэн лотереяҕа оонньоммут сүрүн бириистэри уһуйааннар, оскуолаҕа киирэргэ бэлэмниир бөлөхтөөх оскуолалар туруораннар бар-дьону үөртүлэр.

Үөрэх салаатын иhинэн үлэлиир «НиКа» лаборатория үлэһиттэрин көҕүлээһининэн  үрдүк уонна бастакы категориялаах иитээччилэр маастар кылаастара бэрт сонуннук ааста. Сыл устата ыытыллыбыт үлэ түмүгүнэн,  бу ааттаммыт иитээччилэр «Мастер образовательного процесса» пособиелара бэчээккэ тахсыбыта. Эдэр иитээччилэр маннык тэрээhиннэр саҥа үлэлиир дьоҥҥо олус туhалаахтарын бэлиэтээн туран, салгыы үлэлэhэргэ бэлэмнэрин этиннилэр.

«Аленушка» оҕо сайдар киинин иhинэн тэриллибит, кырачаан дьоҕурун сайыннарыыга олус туhaлаах туой оҥоhуктарынан дьарыктыыр гончарнай мастырыскыай арыйбыттара элбэх киһи сэҥээриитин ылла. Нэдиэлэ устата уhуйааннар ыыппыт тэрээhиннэрэ нэhилиэнньэ араас араҥатын барытын хабан ыытыллыбытын уонна хас биирдии дьиэ кэргэҥҥэ тиийбитин чорботон бэлиэтиир тоҕоостоох.

Олунньу 19 күнүгэр Саха сиригэр оскуола иннинэ үөрэхтээһин тэриллибитэ 100 сылын чэрчитинэн олохтоммут көһө сылдьар Кубок Ньурба улууһугар эстафета сиэринэн үөрүүлээх быһыыга-майгыга туттарылынна. Манна биhиги улуустан 26 киhи кыттыыны ылла.