Муус устар 30 күнүгэр, Өрөспүүбүлүкэ күнүгэр аналлаах, Дьокуускай куорат «SMART» библиотекатыгар  «Литературнай салон» диэн ааттаах уус-уран ааҕыы үһүс төгүлүн бэрт сэргэхтик буолан ааста. Бу тэрээһин Дьокуускай куорат оскуолаларын икки ардыларыгар ыытыллар «Тыыннаах тыл» бырайыак чэрчитинэн буолар. Тэрээһиҥҥэ 57 үөрэнээччи кэлэн, Саха АССР тэриллибитэ 100 сылыгар, Саха Өрөспүүбүлүкэтин күнүгэр аналлаах хоһооннору олус иэйиилээхтик, уустаан-ураннаан ааҕан, көрөөччүлэри сөхтөрөн, бары үөрэн-көтөн тарҕастылар. 

Литературнай салон  Дьокуускай куорат «Айыы Кыһатын» оскуолатын 8 «В» кылааһын үөрэнээччилэрэ Алампа «Саха ырыата» диэн хоһоонун ааҕыытынан саҕаланна. Дьокуускай куорат 19 №-дээх орто оскуолатын үөрэнээччилэрэ Кирикова Вера Сэмэн Данилов   «Киһиэхэ – төрөөбүт дойдута», 7 «Б» кылааһын үөрэнээччилэрэ Тихонов Тимур, Тимофеев Алексей  «Саха таптала» диэн айымньыларын ааҕан иһитиннэрдилэр. Салайааччылара - Матвеева Мария Николаевна.  Иван Мигалкин «Саха тыла барахсан» хоһоонун Антонина Гаврильевна уонна Николай Гаврильевич Чиряевтар ааттарынан Дьокуускай куорат национальнай гимназиятын Егорова Капиталина Семеновна салайааччылаах, 7 «Г» кылааһын үөрэнээччитэ Игнатьева Согдиана олус иэйиилээхтик аахта. Дьокуускай куорат 38 №-дээх орто оскуолатын 5 кылааһын үөрэнээччилэрэ Сэмэн Данилов төрөөбүт дойду, ийэ сиргэ таптал   туһунан  хоһооннору аахтылар. Салайааччы – Прокопьева Мария Егоровна. 
Борисова Марианна Николаевна, Пестерева Надежда Илинична, Аммосова Матрена Николаевна салайааччылаах Дьокуускай куорат 26 №-дээх орто оскуолатын үөрэнээччилэрэ Архыып Абаҕыыныскай хоһооннорун ааҕан, сэҥээриини ыллылар. Дьокуускай куорат 25 №-дээх орто оскуолатын үөрэнээччилэрэ олус сэргэхтик Саха сирин туһунан хоһооннору  ааҕан көрөөччүлэри сөхтөрдүлэр. Кононов Марк 7 «Б» кылааһын үөрэнээччитэ сахалыы тылбаастаммыт үгэлэри олус иэйиилээхтик, туттан-хаптан туран аахта. Салайааччынан Кириллина Саргылана Прокопьевна буолар. 
Литературнай салону  Дьокуускай куорат «Айыы Кыһатын» оскуолатын саха тылын уонна литэрэтиирэтин учуутала Липатова Светлана Афанасьевна салайааччылаах 5 «В» кылааһын үөрэнээччитэ Саввинова Нарыйаана уонна 7 «В», 8 «А», 8 «В» кылааһын уоланнара бөлөҕүнэн  улуу классиктарбыт Алампа, Өксөкүлээх Өлөксөй айымньыларын өрө күүрүүлээхтик, иэйэн-куойан ааҕан олус киэргэттилэр. Уус-уран ааҕыы Өрөспүүбүлүкэ күнүгэр анаммыт Дьокуускай куорат 1 №-дээх орто оскуолатын «Сахаада» диэн ааттаах бөлөх  чаҕылхай толоруутунан түмүктэннэ. Салайааччы - Попова Анна Даниловна.

Тэрээһини Дьокуускай куорат 33 №-дээх орто оскуолатын 9 «В» кылааһын үөрэнээччитэ  Ким Михаил уонна Дьокуускай куоракка 2020 сыллаахха буолан ааспыт «Уус-уран ааҕыы» күрэҕин кыайыылааҕа, билигин  юридическай колледж II курсун устудьуонката Афанасьева Эдуарда иилээн-саҕалаан ыыттылар. 
Маннык уус-уран ааҕыылар өссө да буола турдуннар. Бу үлэнэн биһиги хас биирдии сахалыы тыллаах оҕо төрөөбүт тылынан уустаан-ураннаан сатабыллаахтык, хомоҕойдук саҥарарын, киэҥ эйгэҕэ үөрүйэхтик сахалыы кэпсэтэрин, төрөөбүт тылынан алтыһарын өссө да  күүскэ сайыннарар баҕалаахпыт.

Васильева А.Н. Дьокуускай  куорат  33 №-дээх орто оскуола саха тылын, 
литэрэтиирэтин учуутала, «Уус-уран ааҕыы» түһүлгэтин салайааччыта