КВН – театральнай искусствоттан үөскээбит, билиҥҥи кэмҥэ киэҥ сайдыыны уонна биһирэбили ылбыт туспа жанр буоларын, кини оҕо-ыччат сайдар уонна иитиллэр ураты эйгэтин олохтуурга табыгастаах ньыма буоларын туһунан Саха Республикатын «Саха КВН Лигата» ыччат общественнай тэрилтэтин салайааччыта Геннадий Охлопков сэһэргиир.

Дириҥ ис хоһоонноох ыстатыйаҕа ааптар «Саха КВН» национальнай общественнай хамсааһын 20 сыллаах үлэтин уопутугар тирэҕирэн КВН, ону сэргэ Саха КВН, сайдыбыт историятын, педагогическай уонна психологическай тосхолун, методологиятын ымпыктаан-чымпыктаан сиһилиир, билиҥҥи ыччакка бары өттүнэн ордук табыгастаах уонна сүүйүүлээх дьарык буоларын научнай хабааннаахтык арыйар.

Оскуолаҕа, биитэр орто уонна үрдүк үөрэх кыһаларыгар, КВН хамаандатын тэрийэн үлэлэтэргэ сүрүн болҕомто ханнык хайысхаларга ууруллуохтааҕар, сүрүннээччи киһи (салайааччы, педагог) КВН нөҥүө оҕо-ыччат ханнык сатабылларын (компетенцияларын), хайдах гынан кини ис кыаҕын (потенциалын) уонна дьоҕурун (талаанын) арыйыахтааҕын биир-биир ырытан суруйар.

Маны таһынан ааптар оскуолатааҕы уонна университеттааҕы үөрэх системата сэргэхсийиэхтээҕин туһунан бэйэтин санаанатын үллэстэр, маныаха иитии-үөрэтии эйгэтигэр искусство киһиэхэ быһаччы дьайар ураты аналын табатык өйдөөн уонна туһанан далааһыннаах уонна дириҥ хорутуулаах үлэни тэрийиэхтээхпитин ыйар.

Геннадий Охлопков оҕо-ыччат общественнай хамсааһына саҥа таһымҥа тахсарыгар, коммерческайа суох тэрилтэлэр уонна гражданнар биирдиилээн көҕүлээһиннэрэ сайдарыгар судаарыстыбаннай көмө ньымаларын, оскуолаҕа эбии үөрэхтээһин уонна иитии тиһигин сайыннарыы боппуруостарыгар хас да үлэлээх, киэҥник бэчээттэнэр. Саха Республикатын «Саха КВН Лигата» ыччат общественнай тэрилтэтин, Саха Республикатын Ил Дарханын өйөбүлүнэн тэриллибит «Дьулуур» («Стремление») оҕо биир сомоҕо хамсааһынын, «Саха Республикатын педагогическай этэрээттэрэ» ыччат общественнай хамсааһынын тэрийээччи уонна сүрүннээччи быһыытынан биллэр.

Билигин «Среда роста» консультационнай-методическэй үөрэх платформатын салайааччыта, Пермьнааҕы государственнай гуманитарнай-педагогическай университет аспирана, С.Н. Донской-II аатынан үөрэх сайдыытын уонна идэни үрдэтэр институт сетевой лектора, Саха Республикатын ыччат политикатын уонна гражданскай көҕүлээһин туйгуна, «Надежа Якутии», «385 лет Якутия с Россией», «25 лет СПО-ФДО» знактар хаһаайыннара, федеральнай уонна республиканскай граннар, конкурстан кыайыылаахтара.

Ыстатыйаны сиһилии манна аах.

Саха Республикатын «Саха КВН Лигата»

ыччат общественнай тэрилтэтин пресс-службата, элетронная почта sakhakvn@mail.ru