«Кулун тутар 13-14 күннэригэр Уус-Алдан Кэптэнитигэр сэргэх тэрээhин ааста» диэн олохтоохтор уонна көрөөччүлэр бэлиэтииллэр. Кырдьык, урукку өттүгэр оонньоммотох, хаhааҥҥытааҕар да таhымнаах тэрээһин буолла! Драйв, энергетика, атмосфера, доҕордоhуу, тыҥааhыннаах киирсии... Бу барыта республикаҕа 5 төгүллээх чемпион үрдүк аатын ылбыт, билиҥҥитэ соҕотох – «Лөгөй өрүөлчээннэрэ» хамаанда 20 сыллаах үбүлүөйдээх кубогар аналлаах III республикатааҕы «Саха КВН» оонньууларыгар этэ! Икки күннээх астык оонньуу түмүгүнэн бастыҥнар аатаннылар. Бастакы миэстэ – Аммалар, «Чаҕылхайдар» (Е.А. Шишигин аатынан Сатаҕай орто оскуолата). Хамаанда оонньуу хас да бирииhин итэҕэтиилээхик ылла. «Күн күлүүк» (Мисс КВН) – Нарыйа Судинова. «Бастыҥ куолас» – Алина Онуфриева. Иккиэн «Чаҕылхайдар»!! Онтон салайааччылара Ольга Николаевна Никитина «Саталлаах салайааччы» үрдүк аатын сүктэ. «Кылгас кэм иhигэр хамаанда лаппа кыаҕырбыт, арааhа финалга кыахтаах оонньууну көрдөрөрө буолуо» – диэн дьүүллүүр сүбэ бэрэссэдээтэлэ, Саха Республикатын «Саха КВН Лигата» ыччат общественнай тэрилтэтин салайааччыта Геннадий Охлопков санаатын эттэ. Олох аҕыйан баалынан хаалан иккискэ таҕыста – Горнайтан сылдьар «Солоҕон» хамаанда (С.И. Тарасов аатынан Өрт орто оскуолата). Хамаанда полуфиналтан күүстээх оонньууну көрдөрдө. Маны таhынан элбэх сыллар тухары өйдөнөн хаалар чаҕылхай уобараhы бэлэхтээбит «Солоҕон» хамаанда хапытаана – Андрей Пахомов «Көрдөөх көкөт» (Мистер КВН) үрдүк ааты ылыан ылла. Үhүс миэстэҕэ – инникитин лаппа сайдар кыахтаах Ньурба улууhун «Айыы оҕолоро» хамаанда таҕыста! Оҕолор маладьыастар, соторутааҕыта Сунтаарга ыытыллыбыт «Саха КВН» ыччат оонньууларыгар эмиэ үhүс миэстэни ылбыта. Ол иhин этэн эрдэхтэрэ, ким элбэхтэ үлэлиир, ол элбэҕи ситиhэр диэн! Ньурбаларга инникитин ситиһиилэри баҕарабыт. Дьүүллүүр сүбэ быһаарыытынан 1, 2 миэстэни ылбыт хамаандалар бу дьыл муус устар саҥатыгар Дьокуускай куоракка ыытыллар XX-с республикатааҕы оскуола оҕолорун «Саха КВН» оонньууларын финалыгар кыттыахтара. Кинилэр полуфинал түмүгүнэн эрдэ талыллыбыт 9 хамаанданы кытта күөн көрсүөхтэрэ, сүүрбэһис сезон кыайыылааҕын аатын сүгэр иһин илин-кэлин түсүһүөхтэрэ. Маны таһынан оонньууну сэргэ «Лөгөй өрүөлчээннэрэ» хамаанда үбүлүөйдээх бенефиһин бар дьонугар бэлэхтээтэ. Хамаанда араас сыллардааҕы выпускниктара түмсэн урукку сыллар чаҕылхай программаларыттан быһа тардан көрүдьүөстэрин көрдөрдүлэр, аатырбыт-сураҕырбыт кэмнэрин ахтан-санаан тыл эттилэр, ырыа да ыллаатылар. Бу киэһээ доҕотторо, улуус, нэһилиэк, оскуола администрациялара бэйэлэрин уолаттарын, бастыҥ ыччаттарын чиэстээтилэр. Тэрийэр бөлөх Саха Республикатын ыччат дьыалатын уонна социальнай коммуникацияларга министиэристибэтигэр, Саха Республикатын үөрэҕин уонна наукатын министиэристибэтигэр, Уус-Алдан уулууһун дьаһалтатыгар көмөлөрүн иһин дириҥ махталын биллэрэр. Саха Республикатын ыччат уонна оҕо общественнай тэрилтэлэригэр тирэх буолар киин информационнай сулууспата, төлөпүөн/факс: 42-03-79