Саха тылын саҥа тыыҥҥа
Күндү Сахабыт сирин дьоно-сэргэтэ! «Саха этигэн тыла» http://sakhaetigentyla.ru/ диэн ийэ тылбыт эйгэтин кэҥэтэр, сайыннарар сыаллаах, сахалыы хомоҕойдук саҥарарга, уус-ураннык уонна таба суруйарга үөрэтэр, сырдатар аан ситим баар буолбутун иһитиннэрэбит. Бырайыак Ил Дархан Граанын өйөбүлүнэн тахсар. Салайааччы тыл билимин хандьыдаата, суруйааччы, суруналыыс Ангелина Афанасьевна Кузьмина.
Бу аан ситим саха тылын-өһүн бары дэгэтин туһунан кэпсиир, анаарар аналлаах. Төрөөбүт тылбытынан сөпкө саҥарарга, суруйарга үөрэтэр уруоктар тиһигинэн аттарыллан киирэн иһэллэр. Сааһыттан хааччаҕа суох, ийэ тылбыт кэскилин өйдүүр, ол туһугар туруулаһар, төрөөбүт тылын, үгэһин, култууратын үөрэтиэн баҕалаах, киэҥ эйгэҕэ санааны сахалыы сайа этэ-тыына үөрэниэн, суруйуон, сайдыан баҕалаахтарга ананар. Дьарыктар түмүктэринэн үөрэнэргэ көмө кинигэ тахсара былааннанар.
Суруйааччылар, чинчийээччилэр, кыраайы үөрэтээччилэр олохторун, айар үлэлэрин, айымньы тылын-өһүн, айар ньыма дэгэттэрин ырытыылар, тылы сайыннарыыга, үйэтитиигэ туох үлэ, тэрээһин буола турарын сырдатар суруйуулар тахсаллар. Сахалыы айымньылары наллаан истиэххэ эмиэ сөп.
Ону тэҥэ өбүгэ билиитин, үгэһин, култууратын, норуот үөрэҕин туһунан кэпсиир төрөппүттэргэ, ыччакка аналлаах “Саха суола” диэн сахалыы ютуб-ханаал баар буолла. Ийэ сиргэ ытыктабылы, тапталы иҥэрэргэ туһуланар, чинчийэр, үгэһин, сиэрин-туомун сөргүтэр, төрөөбүт дойдубут кэрэтин кэрэһэлиир, сахалыы тыын сылаас биһигэ буолла. Ханаалга төрөөбүт тылбытыгар үөрэтэр тыл оонньуутун сэргии көрүҥ. Сигэтэ: https://www.youtube.com/channel/UC4aWS9CkkemJoS_gci2fFxA
Бэйэтин норуотун тылын билэр, уус-уран айымньытын, устуоруйатын, олоҕун-дьаһаҕын туһунан ааҕар, үөрэтэр ыччат, бастакытынан, билиитэ хаҥыыр, олоҕу көрүүтэ киэҥ буолар. Иккиһинэн, саха киһитин быһыытынан, өйө-санаата уһуктар, ийэ өйүнэн иитиллэр, төрөөбүт дойдутун, дьонун-сэргэтин дьылҕатыгар ис сүрэҕиттэн кыһанар. Үсүһүнэн, өйө-санаата уһуктубут ыччат олоххо ордук тардыһыылаах, тобуллаҕас буола сайдар. Оччоҕо норуот бүттүүнэ сарсыҥҥыта саргыланар, кэнэҕэскитэ кэскиллэнэр! Күндү доҕоттор, ааҕыҥ, истиҥ, көрүҥ, үөрэниҥ, кыттыһыҥ! Саха сарсыҥҥылаах буоллун!
Комментарии:
Оставьте ваш первый комментарий:
Пройдите авторизацию чтобы оставить комментарий.