Олунньу 15-16 күннэригэр Дьокуускай куорат 17-с нүөмэрдээх оскуолатыгар  олус сонун, сэргэх дьаһал буолан ааста. Оҕо – аймах тапталлаах сурунаала Чуораанчык (Колкольчик), Кэскил оҕо бэчээтин кыһата, Эдэр көлүөнэ театра, Саха Республикатын суруйааччыларын союзтара өйөөһүннэринэн, көмөлөрүнэн үбүлүөйдээх саха суруйааччыларын айымньыларынан хоһоон ааҕыы күрэҕэ буолла.

  Күрэх бастакы күнүгэр алын кылаас оҕолоро кыттыыны ыллылар. Дьаһал саҕаланыытыгар 4 г кылаас хомусчутттара эҕэрдэлээтилэр. Киирии тылы Чуораанчык сурунаал кылаабынай редакторын солбуйааччы Сардана Матвеева эттэ. Кини Дьокуускай куорат үрдүнэн Чуораанчык Колокольчик сурунаалларга саамай элбэх сурутааччылаах, актыыбынай ааҕааччылардаах 17с оскуола буоларын бэлиэтээн туран, кыттааччыларга ситиһиини баҕарда.

  Күрэҕи Т.И. Жиркова, Чуораанчык сурунаал кылаабынай редактора, Прядезникова А.Ф., куораттааҕы библиотечнай ситимтэн, Ефремова В. П., Үүнэр көлүөнэ театр студия салайааччыта сыаналаатылар. Барыта 43 кыттааччы норуодунай суруйааччылар И.В. Мигалкин, С.А. Попов – Сэмэн Тумат, суруйааччылар Е.Сивцев-Таллан Бүрэ, В. Лебедев, К.И. Сосин хоһооннорун аахтылар. Бииртэн биир умсугутуулаахтык, иэйиилээхтик ааҕан, саастарынан кыра да буоллаллар, олус бэлэмнээхтэрин көрдөрдүлэр. 1-2 кылаастар икки ардыларыгар күрэххэ  Спиридонов Проня. Додохова Ираида кыайыылааҕынан таҕыстылар. Кинилэр Чуораанчык анал кубогын, бирииһин тутан үөрдүлэр. Бириистээх миэстэлэргэ. Ганачевская Лиза, Седалищева Кира, Заболоцкая Куннэй, Максимова Мария  тигистилэр, өйдөбүнньүк мэтээллэринэн бэлиэтэннилэр.

  Оттон 3-4 кылаастарга кыайыылаахтарынан Соколова Амелия, Лазарев Петя буоллулар. Бириистээх миэстэлэргэ Матаннанов Айсен, Федорова Арина, Трифонов Вася, Попова Диана таҕыстылар. Бука бары кыттааччыларга номинациялар, бириистэр ананнылар.

  Күрэхпит иккис күнүгэр 5-11 кылаастар саха норуодунай суруйааччылара С.Р. Кулачиков- Эллэй, С.А. Попов – Сэмэн Тумат, И.В. Мигалкин, буойун-  суруйааччылар Г.И. Макаров, Т.Е. Сметанин хоһооннорун ааҕан иһитиннэрдилэр, айымньы ис хоһоонун истээччигэ тиэрдэргэ кыһаннылар. Ордук, 9 кылаас үөрэнээччилэрэ Кузнецов Сергей, Федорова Юлия Дьуон Дьанылы Евгений Онегин сахалыы тылбааһын долгутуулаахтык аахпыттарын иһийэн олорон иһиттилэр. Ити курдук, сөбүлүүр суруйааччыларбыт айымньылара хас биирдиибитин долгутта, умсугутта.

  Түмүккэ кыайыылааҕынан Кузнецов Сергей, Федорова Юлия,  Ханина Виолетта  буоллулар. Оттон бириистээх миэстэлэргэ Антипин Тимур, Шамаева Ангелина,  Павлуцкий Вася, Бурнашев Кирилл, Дегтярева Вержина, Заморщикова Сардана,  Федорова Ирина,  Винокуров Вася, Афанасьева Саина, Федотова Алина таҕыстылар.

  Тэрийээччилэр  бастакы тэрээһин үрдүк таһымҥа ааспытын, оҕолор төһө да долгуйан ыллаллар, олус бэркэ бэлэмнэммиттэрин, кыттыбыттарын бэлиэтээтилэр. Уонна маннык тэрээһин сыл аайы ыытылларыгар, аны куорат, республика таһымыгар тахсарыгар баҕа санааларын эттилэр. Онон, кемүс дорҕооннор өссө да ыраахха көттүннэр, сырдыкка, ырааска угуйдуннар!

 Тэрийээччилэр.