Ахсынньы 10 күнүгэр Дьокуускай куораттааҕы төрүт гимназиятын дьиэтигэр Саха тылын уонна литературатын үөрэтии саҥа саҕахтара диэн ааттаах төгүрүк остуол үлэлээтэ.  Тэрээһинҥэ кыттыыны ыллылар Дьокууускай куорат уонна чугас эркин сытар улуустар оскуолаларын дириэктэрдэрэ, уһуйаан сэбиэдиссэйдэрэ, саха тылын уонна литературатын учууталлара, тылы чинчийэр исписэлиистэр уонна саха тылын туһугар ыалдьар сэҥээрээр төрөппүттэр, дьон.

Үөрэх уонна билим министиэристибэтиттэн миниистири бастакы солбуйааччы Ирина Павловна Любимова кыттыыны ылла. Үгэс курдук өр сылларга тыл бэлиитикэтин үлэтин Феодосия Васильевна Габышева салайан ыыппыта, эрдэ ыытыллыбыт күүстээх үлэни сөргүтэн салгыахха наадатын Ирина Павловна киирии тылга эттэ. Холобура, эрдэ ыытыллыбыт үлэ түмүгүнэн уһуйааннарга, оскуолаларга сахалыы саҥарар эйгэ тэриллэн, сахалыы саҥарарбыт сокуон быһыытынан харыстабыллаах буолан төрөөбүт тылбытынан холкутук саҥарабыт. Урукку сылларга үөрэх тэрилтэлэригэр саха тылын кабинеттарын күрэстэрэ, учууталлар түмсүүлэрэ, уһуйаантан  саҕалаан оскуола үрдүкү кылааһыгар диэри ханнык сөптөөх программалары туттуохха сөбүн, бу үлэни барытын сөргүтэн өрө көтөҕүллүү үлэтэ барыан наадатын туһунан Ирина Павловна иһитиннэрдэ. Кини эппитинэн, үгүс дьон төрөөбүт тыл норуокка суолтатын туһатын өйдөөн, төрөөбүт тыл боппуруостара үрдүкү аан дойдутааҕы таһымҥа таҕыстылар.  Ол курдук, бу дьыл муус устар ыйыгар Америка Нью Йорк куоратыгар Холбоһуктаах нациялар тэрилтэлэрэ төрүт тыл боппуруостарыгар аналлаах улахан тэрээһин ыыппыта. Санатан этэр буоллахха,  бу аан дойду таһымнаах тэрээһинҥэ Саха өрөспүүбүлүкэтин бэрэстэбиитэллэрэ - тыл сэбиэтин бэрэссэдээтэлин солбуйааччы Феодосия Габышева Россия хамаандатын иһигэр киирэн кыттыыны ылбыта.

Кэлэр 2019 сыл Россия таһымыгар төрүт омуктар тылларын аан дойдутааҕы сылыгар аналлаах сыл буоларынан сибээстэээн бэлэмнэнии күүстэх үлэтэ саҕаламмытын туһунан Ирина Павловна   иһитиннэрдэ.  

Национальнай оскуолалары чинчийэр институт дириэктэрэ Светлана Степановна Семенова Россияҕа уонна биһиги республикабытыгар тыл боппуруостарыгар сыһыаннаах тэрээһиннэри билиһиннэрдэ. Ол курдук, кэлэр сайын аан дойду таһымнаах төрүт тылга аналлаах улахан тэрээһин буолара былааннанар, билигин үбүлээһин боппуруоһа быһаарыллар сылдьар.

Бу дьыл от ыйыгар Судаарыстыбыннай дума төрүт тыл сокуонугар уларыйыыны киллэрэн саҥа сокуон ылбыта. Бу сокуон олоххо киирэн, үлэлээн эрэрин туһунан Светлана Степановна кылгастык кэпсээтэ.

Салгыы төгүрүк остуол кыттыылаахтара Россия таһымыгар оҥоһулла сылдьар төрөөбүт тылы үөрэтии кэнсиэпсийэтигэр биһиги республикабытыттан киириэхтээх этиилэрии салгыы ситэрэн-хоторон, санаалары сайыннаран үлэлиэххэ наадатын сүбэлэһэ хааллылар.

СӨ Үөрэҕин уонна наукаҕа министиэристибэтин пресс-сулууспата