Василий  Софронович Долгунов төрөөбүтэ 85 сылыгар аналлаах

Атырдьах ыйын 2 күнүгэр биһиги улууспутугар 6О сыл устата олоҕун үөрэхтээһин эйгэтигэр анаабыт Өрөспүүбүлүкэҕэ  ытыктанар, убаастанар, саха норуота биир тумус туттар киһитэ, педагогическай билим дуоктара, Педагогическай, социальнай билим Академиятын чилиэн-кэрэспэдьиэнэ, Учууталлар учууталлара ДОЛГУНОВ ВАСИЛИЙ СОФРОНОВИЧ төрөөбүтэ 85 сылыгар уонна кини олорон ааспыт олоҕор, айымньылаах үлэтигэр аналлаах “Хас биирдии күн – саҥа аан арыллыыта ” диэн ахтыы киэһэтэ, иһирэх кэпсэтии буолан ааста.

Кэпсэтиигэ кыттыыны ыллылар: Ил Түмэн депутаттара, үөрэппит оҕолоро, Шамаев Иван Иванович, Тумусова Марфа Семеновна, Саха сирин үөрэҕин Министирин солбуйааччы Габышева Федосия Васильевна,  Үөһээ Бүлүү улууһун баһылыга Поскачин  Владимир Семенович, улууспут бэтэрээн учууталлара Тимофеева Ульяна Терентьевнаҕа, Иванов Николай Федорович, история билимин дуоктара Архипов Никита Деевич,  1969 сыллааҕы выпуһун үөрэнээччитэ Семенов Михаил Федорович, биир дойдулааҕа Семенов Егор Михайлович, өр сылларга бииргэ үлэлээбит доҕотторо, коллегалара, Егорова Елена Алексеевна, Корякин Николай Павлович, Иванова Валентина Семеновна, Филиппов Олег Егорович, бэтэрээн учууталлар сэбиэттэрин бэрэссэдээтэлэ Стручков Дмитрий Дмитриевич, эдэр учуонай Яковлев Айтал Игоревич, аймах балта Долгунова Раиса Семеновна,  59 сыл устата бииргэ олорбут кэргэгэ Долгунова Александра Никитична уонна  чугастык саныыр дьоно-сэргэтэ, бииргэ үлэлээбит коллегалара.

Бу күн, саҥа аан арылларын курдук,  Василий Софронович олорон ааспыт олоҕун, күргүөмнээх үлэтин, истиҥ- иһирэх сыһыанын,  туох-ханнык киһи  буоларын туһунан   элбэх санаа этилиннэ. Ол курдук кини, бастатан туран патриот буоларын, аҥардас төрөөбүт улууһугар, Өрөспүүбүлүкэтигэр  сүрдээх элбэҕи, туохха да тэҥнэммэт, киһи ааҕан сиппэт өҥөтүн, туһалааҕы, кэскиллээҕи оҥорон хаалларбытын, сөптөөх суолу тутуспутун,  “Мин кэриэһим, паамытынньыгым - ити гимназиям” - диэбит, олоҕун тиһэх күннэригэр  эппит этиитэ элбэҕи туоһулуурун бэлиэтээтилэр.  Иккиһинэн,  оскуолаҕа учуонайдар үлэлииллэрин ситиспитин ураты салайааччы уонна бэйэтэ 2006 сыллаахха  үлэлээн кэлбит уоппутун түмэн,  улахан кэскиллээх үлэни суруйан, педагогическай билим доктора буолбутун; үсүһүнэн,  үөрэхтээһин систиэмэтигэр саҥаттан саҥа сүүрээни киллэрбит, саҥаттан толлубат хорсун киһи, күүстээх методист буоларын; төрдүһүнэн, үтүө үгэстээх, биир кэлим ситимнээх, биир салгынынан тыынар, биир өйүнэн-санаанан салайтарар, тэрээһиннээх, бэйэ-бэйэҕэ мэһэйдэспэт, көмөлөсүһүү тыына турар  кэлэктиибин тэрийбитин; бэсиһинэн, эппиэтинэстээх, бэриниилээх, кыһаллымтыа, дьон ордугар-хоһугар наадыйбат, судургу, көнө, кыаммакка-түгэммэккэ кыһанар, бииргэ үлэлиир дьонугар болҕомтолоох, кимниин хайдах сыһыаннаһарын билэр күүстээх психолог быһыытынан уонна ыал ытык аҕата- алаһа дьиэ өһүөтэ, эрэллээх кэргэн, дьон убаастыыр, ытыктыыр, сүгүрүйэр  киһитэ буоларын чорботон бэлиэтээтилэр. Ол эрэ буолбатах. Үлэлээн кэлбит үлэтин хайысхатын саас-сааһынан эмиэ аҕыннылар. Ол курдук, хайа үлэтин саҕалыаҕыттан оҕолор ортолоруттан бэйэлэриттэн лидердэри иитэн таһаарыыны, оҕо билбит билиитин олоххо, практиказа туһаныытын, үөрэҕи- үлэни  бэйэтинэн тэрийиитин, эр дьону учуутал идэтигэр тардыытын,  талааннаах, сатабыллаах, энтузиаст дьону түмэн сөптөөхтүк салайан, үөрэхтээһиҥҥэ, иитиигэ  үрдук ситиһиини кыайбытын- хоппутун тоһоҕолоотулар.

Ахтыы киэһэтин биир уртытынан буолла- кини үрдүк аатын үйэтитии туһунан кэпсэтии.  киирбит этиилэргэ олоҕуран, маннык резолюция ылылынна :

- сылын ахсын Василий Софронович дуоктарын диссертациятын көмүскээбит сэтинньи 19 күнүгэр  педагогическай ааҕыылары тэрийии;

- кини аатын Боотулу оскуолатыгар эбэтэр Үөһээ Бүлүүтээҕи кванториумҥа иҥэрии;

- лиссиэй- интэринээт тэлгэһэтигэр физмат хамсааһыны төрүттээбит дьоҥҥо анаан сквер

туруоруу;

- муус устар 19 күнүгэр, биир сылыгар, кини туһунан ахтыы кинигэтин

презентациялааһын;

- «Саха Өрөспүүбүлүкэтин Норуодунай учуутала” үрдүк  ааты иҥэрэри ситиһии.

Василий Софронович  үлэлээбит үлэтэ, оҥорбут дьыалата, саҕалаабыт саҥа саҕахтара

инникитин өссө да тиһигин быспакка салҕаныа, муҥура суох кэскиллээх баҕа санаата,

үөрэппит-такайбыт үөрэҕэ, сүбэлээбит сүбэтэ олоххо  киллэриллиэ, ситиһиилээх түмүгү

кэрэһэлиэ, кэлэр көлүөнэ кини үрдүк аатын өрүү ааттыы туруо диэн эрэнэбит.  Ол эрэн

биири эрэ өйдүөххэ наада: кимиэхэ да сыһыары тутан тэҥнээбэккэ, аатын-суолун күөн

көрсүһүннэрбэккэ, ыксаабакка, тиэтэйбэккэ, тыыннааҕар баарын курдук сэмэйдик, үрдүк

аатын үйэтитиэххэ,  60 сыл устата чиэһинэйдик, бэриниилээхтик үлэлэммит үлэ

суураллыбат.

 Татьяна Никифорова , Үөһээ Бүлүү